Союз маалында жогорку кызматтарда эмгектенген кыргыздын камчыга сап уулу кезинде республикада бир топ иштерди жасаган.
Партиялык ишмер Абды Сүйөркулов Жалал-Абад облусундагы Торкен айылында 1912-жылы 12-декабрда туулган. Кичинекей кезинен энесинен ажырап калып, атасынан алыс, жетимдер үйүндө тарбияланган. Билим алууга дилгир өспүрүм ошол жактан орус тилин өздөштүргөн. Андан соң Фрунзедеги соода жана контролдук мектепте билим алып, 1930-жылы Ташкент шаарындагы жогорку окуу жайга даярдоо курсунан өтүп, Москвадагы пландык экономика институтун кыска убакытта аяктаган.
Эмгек жолун Кетмен-Төбө районундагы керектөө союзунун жетекчилигинен баштап, 30-жылдары республикадагы райондордун каржы, салык, чарба бөлүмдөрүндө иштеген. Ошондой эле колхоз жетекчиси, райондук, облустук аткаруу комитеттеринин төрагасы да болгон.
Бара-бара тажрыйба топтоп, 29 жашында Кыргызстан коммунисттик партиясынын Борбордук комитетинин биринчи катчысы, 37 жашында Кыргыз ССРинин өкмөтүнүн башында турган.
Согуштан кийин Министрлер кеңешинин төрагасы болгондо өлкөдөгү Опера жана балет театры, Кыргыз мамлекеттик университети ишке берилип, Бишкек — Ош унаа жолунун курулушу уланган. Партиялык ишмер андан соң он жылдай Соода министрлигин башкарган. Пенсияга чыккандан кийин Фрунзедеги "Элдик чарбанын жетишкендиктери" жарманкесинин директору болуп, аны тогуз жыл жетектеген.
Кыргыздын камчыга сап уулу 1992-жылы 80 жаш курагында көз жумган.