БИШКЕК, 7-дек. — Sputnik. Россия өкмөтү Кыргызстанга техникалык жардам катары бактериологиялык жана көптөгөн индикациялык изилдөөлөрдү жүргүзүүгө ылайыкталган мобилдик лаборатория берди. Бул тууралуу Саламаттык сактоо министрлиги кабарлады.
Аталган комплексти тапшыруу аземи бүгүн, 7-декабрда, Карантиндик жана өзгөчө коркунучтуу инфекциялар республикалык борборунда тапшырылды. Иш-чарага саламаттык сактоо министринин орун басары Улук-Бек Бектурганов жана россиялык "Микроб" чумага каршы илим-изилдөө институтунун өкүлү Екатерина Найденова катышкан.
Мобилдик комплекс КАМАЗ автоунаасынын базасында салынган. Ичинде бактериологиялык жана индикациялык эки лаборатория болот. Анын жардамы менен биологиялык коопсуздук эрежелерин сактап холера, чума, COVID-19 сыяктуу коркунучтуу жугуштуу ооруларды аныктоого мүмкүнчүлүк түзүлөт.
Министрлик былтыр да Россия тарап ушундай эле төрт мобилдик лаборатория берип, пандемия маалында вирустун жайылышына бөгөт коюуга өбөлгө болгонун белгиледи.