БИШКЕК, 2-дек. — Sputnik. Россиянын "Матч ТВ" телеканалынын комментатору, спорттук берүүлөрдүн алып баруучусу Александр Аксенов Бишкекте жаңыдан журналисттик кесипке киришкендер үчүн тренинг өткөрүүдө.
Бүгүн иш-чаранын биринчи бөлүгү Алыкул Осмонов атындагы Улуттук китепканада башталды. Эртең менен Чыңгыз Айтматов атындагы залда жүздөн ашуун журналисттер жана борбор калаадагы ири университеттердин журналистика факультетинин студенттери чогулушту.
Москвадан келген конок спорттук баяндамачынын иши, социалдык тармактардын ролу, кадрда иштөө жана башка көптөгөн жагдайлар тууралуу айтып берди.
Белгилей кетсек, тренингге Россиядагы эң мыкты комментаторлордун бири Тимур Журавель видеобайланыш аркылуу кошулган. Ал кыргыз журналисттерине тажрыйбасы менен бөлүшкөн.
Эртең, 3-декабрда, "Заманбап журналистиканын актуалдуу тренддери" деген темада тегерек стол өтөт.
Тегерек столдун катышуучуларын каттоо 9:30да башталат. Бардык иш-чаралар Россотрудничество тарабынан уюштурулууда.