БИШКЕК, 28-ноя. — Sputnik. КМШ ПАА эл аралык байкоочулар тобунун координатору, Өзбекстандын Олий Мажлиси сенатынын коргоо жана коопсуздук маселелери боюнча комитетинин төрагасы Кутбидин Бурханов Бишкек шаарынын шайлоо участкаларында добуш берүүнүн жүрүшү тууралуу айтып берди.
КМШ Парламенттер аралык ассамблеясынын делегациясы Жогорку Кеңештин депутаттарын шайлоо процессине байкоо жүргүзүүдө. Бурхановдун айтымында, бир күн мурда алар партия өкүлдөрү, прокурорлор, БШК мүчөлөрү менен жолугушкан.
"Биз партия лидерлери менен жолугуштук, алар үгүт өнөктүгү кандай өткөнүн айтышты. Добуш берүүлөр башталганына аз эле убакыт болду, азырынча тынч, эреже бузуулар жок. Мен баарлашкан талапкерлер шайлоонун расмий жыйынтыгын күтүп жатышат", — деген Бурханов.
КМШ ПАА кеңешинин башкы катчысы Дмитрий Кобицкий бүгүн миссия мүчөлөрүнүн ар бири кеминде он шайлоо участкасын кыдырарын билдирди.
"Жалпысынан Кыргызстанда шайлоо тынч өтүп жатат. БШКнын өкүлдөрү үгүт иштери, шайлоого даярдык жана шайлоонун өзү талаптагыдай деңгээлде өтүшү үчүн бардыгын жасашты. Шайлоочулар добуш берип жатышат, адаттагыдай эле эртең менен эл көп эмес, бирок түшкө жакын адамдар көбөйөт деп ойлойм. Миссия мүчөлөрүнүн ар бири кырдаалга калыс баа берүү үчүн кеминде 10 жерди кыдырып чыгышат. Биз кечинде шайлоо участкалары жабылгандан кийин жолугуп, жыйынтыгы боюнча корутунду чыгарабыз", — деген Кобицкий.
Быйыл жаңы Баш мыйзамга ылайык, Жогорку Кеңеш жаңы эреже боюнча шайланат: 54 талапкер партиялык тизме менен (пропорционалдык система), ал эми 36сы бир мандаттуу округдардан (мажоритардык система) келет.
Пропорционалдык система боюнча шайлоочулардын тизмесине 3,7 миллиондон ашык кыргызстандык киргизилген (чет өлкөдө жүргөн жарандар да эсепке алынат). Бир мандаттуу округдар боюнча да 3,6 миллион жаран добуш бере алат (чет өлкөдөгү кыргызстандыктар эсептелбейт).
Учурда шайлоо кандай өтүп жатканын биздин онлайн-репортаждан окуп билсеңиз болот.