Бүгүн, 28-ноябрда, Кыргызстанда парламенттик шайлоо өтүп жатат. Бул ирет шайлоочулар жаңы эреже менен добуш беришет. 54 талапкер партия тизмеси менен шайланса, 36сы Жогорку Кеңешке бир мандаттуу округдан барат.
БШКнын маалыматына караганда, саат 14:00гө карата шайлоочулардын 16,27 пайызы добуш берди. Бул 602 432 кыргызстандык шайлоого катышканын түшүндүрөт.
Парламенттик шайлоонун жүрүшүнө эл аралык 730 байкоочу көз салууда. Жалпысынан Кыргызстан боюнча 2 435 шайлоо участогу ачылган. Мындан сырткары, чет мамлекеттердеги мекендештер үчүн 29 өлкөдө 59 шайлоо участогу уюштурулган.
Президент Садыр Жапаров жубайы Айгүл Жапарова менен Чоң-Арык айылындагы № 1053 шайлоо участкасына барып добуш берди. Андан соң өлкө башчы элге кайрылып, келечекке кайдыгер карабай, шайлоого активдүү катышууга чакырган. Ал жактан чыгары менен мамлекет башчы Экономикалык кызматташтык уюмунун (ЭКУ) 15-саммитине катышуу үчүн Түркмөнстанга учуп кетти.
Партиялык тизме боюнча добуш берүүгө 3,7 миллион кыргызстандык кирген (бул сандын ичинде чет өлкөдөгү мекендештер дагы бар). Ал эми бир мандаттуу округ боюнча тизмеге 3,6 миллион адам кирген (мында чет жактагы кыргызстандыктар жок, анткени алар партиялык тизмеге гана добуш бере алышат).