БИШКЕК, 24-ноя. — Sputnik. Бишкек мэриясы бүгүн, 24-ноябрда, борбор калаанын абасында зыяндуу заттар өтө көп эместигин кабарлады.
Маалымат кызматы Дүйнөлүк саламаттыкты сактоо уюмунун ченеми боюнча РМ 2.5 бөлүкчөсүнүн жылдык орточо деңгээли кубометрине (мкг/м3) 10 микрограммды түзүшү керектигин билдирди. Ал эми суткасына 25 мкг/м3 көрсөткүчүнөн ашпашы керек.
Бүгүн, 24-ноябрда, Бишкектин бир катар райондорунда бөлүкчөлөр 9 мкг\м3 деңгээлинен көтөрүлгөн эмес.
Бишкекте күн жылуу, тагыраагы, +15 градус. Анткен менен 26-27-ноябрда аба ырайы бузулуп, сууктап, бул ыштын пайда болушун шарттайт. Буга чейин шаардагы экологиялык көйгөйлөр боюнча атайын комиссия түзүлгөн. Борбордун мэриясы абанын абалы боюнча шаардыктарга күн сайын маалымат берип турууну чечти. Керектүү маалыматтарды Кыргызгидрометтин сайтынан да тапса болот.