Муратбек Рыскулов 1909-жылы 23-ноябрда Жумгал районунун Чаек айылында туулуп, балалыгы жетимчиликте өткөн. Борбор калаага 16 жашында келип, театрда кара жумушчу болуп иштеп жүрүп бир күнү жумушка келбей калган актердун ордуна "Ревизор" спектаклинде роль аткарып, сахнага кадам таштайт. Кыргыз музыкалык драма театрында 25 жашында билим алып, театрдын сахнасына чыккан. Залкар талант дүйнөлүк жана кыргыз спектакль, пьесаларында ондогон образ жаратып Англияга чейин жеткен. Ал жакта "Король Лир" пьесасы боюнча дүйнөнүн булуң-бурчунан чогулган актерлор менен ат салышып, Рыскулов Лирдин монологун кыргыз тилинде аткарып Улуу Британиянын ханышасы Елизавета IIни жана англиялык көрүүчүлөрдү таң калтырган.
Муратбек Рыкуловдун өмүрлүк жары да театрда, кинодо белгилүү ролдорду аткарган актриса Сабира Күмүшалиева. Жубайлар 38 жыл бирге өмүр сүрүп, төрт баланы тарбиялап өстүргөн. Алардын уул-кыздарынын ичинен Искендер ата-энесинин жолун жолдоп, кийин белгилүү режиссерлордун бирине айланган.
Кыргыз ССРинин Жогорку Советинин төрт жолку чакырылышынын депутаты, залкар талант 1974-жылы 64 жаш курагында жарык дүйнө менен кош айтышкан. Залкар актердун жараткан образдары азыркыга чейин көпчүлүктүн эсинде.