Балдар психологу катары алар менен сүйлөшкөндө же ар кандай тесттерди жүргүзгөнүбүздө жашоолорун компьютердеги виртуалдык оюндардай көргөн жеткинчек, өспүрүмдөрдү кездештиребиз. Алар ата-энесинин мээримин жетишерлик деңгээлде албагандыктан, виртуалдык оюндун каарманындай өлүп калып, анан жакындарынын аны эстеп кайгырганын көргүсү келишет. Бул кооптуу маселе. Мындай пикирин Асел Суюмбаева Sputnik Кыргызстан радиосунда маек куруп жатып билдирди.
Анын айтымында, азыркы учурда ата-эне мээримине суусаган балдар көбөйдү.
"Ички, тышкы миграция, жумушсуздук жана башка социалдык көйгөйлөрдөн сырткары гаджеттер да биздин балдарыбызга жеткиликтүү көңүл буруп, тарбия берүүбүзгө тоскоолдук жаратып жатат. Мунун баары келечек муундун психологиясына терс таасирин тийгизет. Биз, улуулар, балдарга материалдык байлыктын артынан кууп жашаганды, эсептешип иш кылганды өзүбүздүн жүрүм-турумубуз менен үйрөтүп жатабыз. Сен жакшы окусаң муну сатып берем деп балабызга сүйүүбүздү акча менен ченеп калдык. Мындай абалда бала жеткиликтүү мээрим ала албай жан дүйнөсү кыйналат. Алар аны сөз менен түшүндүрүп айтып бере алышпайт, анткени турмуштук тажрыйбалары жок. Мунун кесепетинен компьютердик каармандардан өздөрүн издеп, кыялында ошолордой болуп жоголуп кетсе, жакындары аны издеп, өксүп, кайгырып ыйлайт деп ойлошот жана чын эле суицидге барсам ушундай болот деп ишенишет. Кайра тирилип келип, баары жакшы болуп калчудай сезишет. Тилекке каршы, виртуалдык оюндар менен жашоо эки башка нерсе экенин айырмалай албай калган балдар арабызда көбөйүүдө. Азыр билинбегени менен мунун кесепети кооптуу",— деди Суюмбаева.
Психолог ата-энелерди балага адамгерчиликти, сүйүүнү үйрөтүүгө чакырды.