БИШКЕК, 7-ноя. — Sputnik. Россиянын вице-премьери Юрий Борисов "Россия 1" телеканалынын "Москва. Кремль. Путин" программасынын эфиринде учкучсуз башкарыла турган транспортко өтүү тренд болуп жатканын айтып, өлкөдө кандай заманбап техникалар бар экенин атаган. Бул тууралуу РИА Новости жазды.
"Мактанып, сыймыктана турчу нерсебиз бар. Акыркы 10 жылдын ичинде кырдаал өзгөрдү. Бизде учкучсуз башкарыла турган аппараттардын топтому бар. Бул жаатта көп иштер жасалып жатат. Анткени бул куралдуу күчтөрдүн келечегине керек", — деген Борисов.
Ноябрь айынын башында Россиянын президенти Владимир Путин өлкөнүн армиясында 2 миңден ашык учкучсуз башкарыла турган техника бар экенин айткан.
Билдирмеге караганда, Россиянын эки коргоо ишканасы өлкө армиясы үчүн аскердик роботторду даярдап жатышат. Ал роботтор аймакты кайтарып, чалгындоо иштерин жүргүзүшөт.
Мындан тышкары, "Уралвагонзавод" Т-72Б3 базасында роботтоштурулган дрондордун эки модификациясын түзүү менен алек экени айтылды. Алардын бири — экипажы жок аскердик оор автоунаа. Экинчиси — экипажсыз, автоматтык пушкалуу аскердик автоунаа.
"Россиянын армиясында чынжыр дөңгөлөктүү "Уран-9" сокку уруучу дрону дагы бар. Ал чалгындоо, күчтөрдү ок атуу менен колдоо, душмандын аскердик техникасын талкалоого ылайыкталган. Сүрү катуу 12 тонналык сооттолгон машина тескелүүчү "Атака" курал комплексин ташыйт. Анын курамында танкага каршы коргонуу ракеталары, "Шмель" реактивдүү огнемёттору, 30 мм. автоматтык замбиреги, 7,62 мм. пулемёту бар", — деп жазылат маалыматта.
Суу алдында жана үстүндө жүргөн роботтор дагы жасалганы айтылды. Бул катарда өзөктүк кыймылдаткычы бар "Посейдон" суу түбүндөгү тутуму өзгөчө орунда турат. Ал каалаган бутасын же бүтүндөй агрессорду таамай жок кылууга жөндөмдүү.