БИШКЕК, 2-ноя. — Sputnik. Кыргызстанда орточо айлык былтыркы жылдын январь-август айына салыштырмалуу 9 пайызга көбөйдү. Бул туурасында Статистика боюнча улуттук комитеттин маалымат кызматынан кабарлашты.
"2021-жылдын январь-август айларында бир жумушчунун (чакан ишканаларды албаганда) орточо айлык акысы былтыркы жылдын ушул мезгилине караганда 9,3 пайызга көбөйүп, суммасы 19 586 сомду түзгөн", — деп айтылат маалыматта.
Улуттук банк койгон валюта курсу менен алганда 2021-жылдын январь-август айларында бир жумушчунун орточо маянасы 231,6 доллар болду.
Орточо айлык республиканын бардык аймактарындагы ишканалар менен уюмдарда көтөрүлгөнү байкалган дешти.
"Маянанын көбөйүшү Ош облусундагы (10,9 пайыз), Ош (13,5 пайыз), Бишкек (9,9 пайыз) шаарларындагы ишкана-уюмдарда иштегендерде байкалган. Ал эми айлыгы көтөрүлгөндөр Бишкекте (24 931 сом), Нарын (18 870 сом) жана Жалал-Абад (18 609 сом) облусунда катталган", — деп билдирди Статком.
Мындан мурдараак Статком эл көп колдонгон азык-түлүктүн баасы Бишкек, Нур-Султан, Москва жана Минск шаарларында кандай экенин салыштырган эле.