БИШКЕК, 28-окт. — Sputnik. Аэрофотограф Михаил Дудин Бишкектин асмандан тартылган сүрөтүн жарыялап, борбор калааны кара түтүн каптай баштаганын эскертти.
Кадр Бишкектин Асанбай кичи районунан тартылган. Сүрөттөн Бишкектин чок ортосу менен чет жакаларында аба кирдегенин көрүүгө болот.
Соцтармактын колдонуучулары кара түтүн октябрда эле пайда болгонун жазышты. Экоактивист Влад Ушаковдун айтымында, катуу суук түшөрү менен ыш жакшы байкала баштайт.
Соңку жылдары суук түшөрү менен борбор калааны ыш каптоодо. Өткөн жылкы кышта Бишкек абасы кир шаарлардын ичинен World Air Quality версиясы боюнча биринчи орунга чыккан. Бийлик өкүлдөрү буга турак жайлар менен коммерциялык объектилерди жылытууда көмүрдүн жагылышы жана ТЭЦ менен автоунаалардан чыккан түтүн себеп болуп жатканын билдиришкен.
Ал эми медиктер кир аба ден соолукка терс таасирин тийгизерин эскертип келишет.