ЖМКда Кыргызстандын министрлер кабинети "Электр станциялары" ишканасын Бишкек ЖЭБине көмүр ташып келүү, буу казандарын жана башка жабдууларын карап иштетүү үчүн Hampton Resources Limited жеке компаниясы менен келишим түзүүгө милдеттендирди деген маалымат тараган.
Анда компания тейлегенге ЖЭБдеги 15 буу казандын жана комплектилөөчү башка жабдуулардын берилери айтылган.
Депутат Наталья Никитенко Facebook баракчасына министрлер кабинетинин бул боюнча расмий документин, тагыраагы, буйругун жарыялаган. Ал белгисиз компания Кыргызстандын стратегиялык маанидеги ишканасын кайдан жүрүп иштетип, тейлеп каларына кызыккан.
Sputnik редакциясы бул компания туурасында билип көрүүнү чечти.
Hampton Resources limited компаниясы туурасында Кыргызстандын маалымат айыдыңында жыл башында, январь айынын аягында, сөз болгон.
Анда кыргыз өкмөтүнө бул ишкана өлкөнүн энергетикалык системасын өнүктүрүү жөнүндө долбоорун сунуштаган. Тагыраагы, республикадагы бардык электр станциялары менен буу казандарды байытылган жергиликтүү көмүр менен иштей тургандай кылуу керек деген сунушун айткан. Балыкчы — Кара-Кече — Миң-Куш темир жолун этап менен электрлештирип курууну жана болгон буу казандардын базасында мини ЖЭБ киргизүүнү айткан.
2021-жылдын январында Hampton Resources limited өкүлдөрү менен вице-премьердин милдетин аткарып жаткан Равшанбек Сабиров жолуккан.
Ошол кезде өкмөттүн маалымат кызматы Hampton Resources Limited жетекчиси Карина Авдеева экендигин билдирип, фирма Казакстандагы (Караганда) ТОО Exim Artis көмүр компаниясынын туунду ишканасы экендигин маалымдаган.
"Компания директору Карина Авдеева. Сунуштун бет ачарын Exim Artis жана Hampton Resources Limited директорлор кеңешинин мүчөсү (акционер) Т. Адамкулов өткөрдү", — деп кабарлаган өкмөттүн маалымат кызматы.
Exim Artis сайтында алар көмүрдү сатып алып иштетип, кара алтындын баалуу сортторун (кокс жана жылуулукту жакшы бөлүп чыккан түрү) кайра сатуу менен алектенери, продукциясын чет жактарга жана Казакстандын ички рыногуна соодалай турганы жазылган.
Ал эми ачык маалымат булактарында Hampton Resources limited тууралуу маалымат өтө аз. Мындай аталыштагы компаниянын Лондондо жайгашканы айтылган.
Расмий сайтында көмүр боюнча дүйнөлүк рынокто 1998-жылдан бери келе жаткандыгы жазылып турат. Андагы маалыматтарга таянсак, Казакстанда "Батыр", "Кировская" жана "Западная" көмүр шахталарын иштетет. Мындан сырткары, "Караганда" жана "№ 38" деп аталган көмүр байыткан фабрикалары бар.
Сайтка үңүлө келгенде компаниянын өнөктөшү Магнитогорск металлургиялык комбинаты, Evraz деп аталган эл аралык кен казуучу компания, дүйнөдөгү ири көмүр трейдери Carbo One жана ири металлургиялык ArcelorMittal компаниясы деп жазылган.
Сайтта окурмандар үчүн кызык боло турган мындан башка маалымат жок.