БИШКЕК, 20-окт. — Sputnik. Терапевт жана инфекционист Нуржахан Фаллахи адамдын көп эстей бергени кайсы оорудан же эмнеден кабар берерин РИА Новостиге айтып берген.
"Эстөө — адамдын өзүнөн өзү эле болуп кетчү дем алуу кыймылы. Ал тээ тереңден чыгат. Булчуңдардын жумшарышы жана дем алуу жолдорунун кеңейишин эске алсак, бул рефлекс пайдалуу. Киши стресс же бир нерсеге кыжалат болгондон кийин эстесе эс алып калат, мээнин иштешин активдештирет. Бирок эстегенде дагы бир нерсени көңүлгө түйүп алыш керек, бул кайсы бир илдет туурасында кагылган коңгуроо да болушу мүмкүн. Ал депрессияда — канда кортизол (стресстин гормондору) көбөйүп кеткенде, калкан бездеринин иштеши бузулганда, кант диабетинде, гемоглобин төмөндөгөндө, жыныстык гормондордун концентрациясында, жүрөк-кан тамыр системасынын (инфаркт, инсульттан кийинки абал) аксашында, боор ооруганда, май алмашуу бузулганда пайда болушу мүмкүн", — деген дарыгер.
Нуржахан Фаллахи анткен менен адам алдын ала эле өзүнө диагноз коюп алып бүлүнө бербеш керектигин айткан. Кишилер чарчаганда, уктабай калганда, стресске кабылганда же жөн гана угуп же көрүп жаткан нерсеси кызыксыз болгондо да эстешет. Адис жогорудагылардан сырткары аллергияга же депрессияга каршы дарыларды ичкендерде да бул көрүнүш кайталанарын кошумчалады.