Панфилов районунун Эркин-Сай айылында төрөлгөм. Ата-энем айылдык интеллигенциянын өкүлдөрү эле. Апам айылдык ооруканада акушер, атам кыргыз тили жана адабияты мугалими, жергиликтүү мектепте башкы мугалим болгон. Бирок үйдө ар дайым чыгармачылык атмосферасы өкүм сүрүп турчу. Атам комузду мыкты черткен, апам абдан жакшы ырдачу. Мен үйдүн эң кичүү баласымын. Бул тууралуу Досмат Садыркулов Sputnik Кыргызстан радиосунун "Күн башат" программасынын эфиринде маек куруп жатып баяндады.
Анын айтымында, учурда үй-бүлөсүнүн жети мүчөсү, анын ичинде эки келини да балет артисттери.
"Балетке капысынан эле келип калдым. Совет мезгилинде жайкысын хореографиялык окуу жайлардын мугалимдери таланттарды издеп, айылдарды кыдырышчу эле. Байкем экөөбүз жөн эле кароого катышып көрдүк. Бир тууганым бир аз тартынчаак болуп, тандоодон өтпөй калды, ал эми мени бий мектебине чакырышты. Бирок атам каршы болгон, анткени улуу агаларымдын көбү шаарга кетип, байкем экөөбүз үйдө ата-энеме жардам беришибиз керек болчу. Тилекке каршы, ошол учурда атам катуу оорудан каза болуп калды. Андан кийин үй-бүлөлүк кеңеште мени окууга кое берүү чечими кабыл алынды. 1981-жылы Бишкек балет мектебин аяктадым. Андан кийин 1989-жылы Агриппина Ваганова атындагы Ленинград академиялык хореографиялык мектебинде Мельникова менен Ивановдун класстарында окуудан өттүм. Андан соң 1989-жылдан бери Кыргыз опера жана балет театрында иштеп, "Лебединое озеро", "Щелкунчик", "Жизель" жана башка көптөгөн спектаклдерде 20дан ашуун башкы ролдорду аткардым. Көп жаңы артисттер кордебалеттен солистке чейин узак жолду басып өтүшөт. Бирок мага чоң ишеним артышып, алгачкы жылдардан тартып спектаклдерге башкы солист катары кое башташкан. Учурда менин уникалдуу үй-бүлөм бар. Жубайым да балерина, жаш кезинде бийлечү, азыр сабак берет. Эки уулум жана келиндерим балет бийчилери. Кичүү кызым да жашоосун балет менен байланыштырууну чечти", — деди Садыркулов.
Артист Кыргыз улуттук опера жана балет театры согуш учурунда, эл ачка кезде курулганын эскерип, азыркы учурда аталган искусствого болгон мамиле кейитерин кошумчалады.