БИШКЕК, 15-окт. — Sputnik. Кыргызстандын биринчи президенти Аскар Акаев Чолпон-Атадагы "Алтын балалык" реабилитациялык балдар борборуна 1 миллион сом которду. Бул тууралуу анын тарапташы билдирди.
Маалыматты саламаттык сактоо министри Алымкадыр Бейшеналиев да тастыктады. Эске салсак, бүгүн Бишкекте балдар жана ден соолугунан мүмкүнчүлүгү чектелген адамдарга багытталган реабилитациялык борборду ишке киргизүү үчүн кайрымдуулук марафону башталды.
Министрдин айтымында, ал кечээ күнү мурдагы президент менен сүйлөшкөн.
"Акаев марафондо сөз сүйлөгүсү келген, бирок техникалык мүчүлүштүктөр болуп калды. Ошондуктан мен анын катын окуп бердим. Ооба, Аскар Акаевич бир миллион сом которду", — деди Бейшеналиев.
Акаевдин катында Кыргызстандын жетекчилигинин демилгесин колдоп 1 миллион сом которгону айтылат. Ал бул каражатты Россиянын фундаменталдык изилдөө фондунан быйыл илимий грант катары алганын билдирген. Катта Акаевдин кол тамгасы жана бүгүнкү күндүн датасы турат.
Эске салсак, комплекс убагында Акаевдин жубайы Майрам Акаева жана анын "Мээрим" фонду тарабынан негизделген. Экс-президент 2005-жылдагы март окуялары балдардын реабилитациялык борборунун ишин көпкө, 16 жылга токтотуп койгонун белгилеген.
Экс-президенттин катын Sputnik редакциясына Акаевдин тарапташы Бекболот Талгарбековдун уулу Арстан Талгарбеков берди
© Фото / предоставлено Арстаном Талгарбековым
Экс-президенттин катын Sputnik редакциясына Акаевдин тарапташы Бекболот Талгарбековдун уулу Арстан Талгарбеков берди.
Бүгүн кайрымдуулук иш-чарасына Садыр Жапаров дагы катышып, президенттин фондунан 3 миллион сом бөлдү. Министрлер кабинетинин төрагасы Акылбек Жапаров дагы ушундай эле сумма берди. Ал эми биринчи айым Айгүл Жапарова 500 миң сом которду.
Акцияга келгендердин бардыгы кайрымдуулук иретинде колдоо көрсөтүштү. Саламаттык сактоо министринин айтымында, жалпы жонунан 40 миллион сом топтолду.
Садыр Жапаров борбордун курулушу 2000-жылдары башталып, дубалы тургузулуп, бирок 2005-жылы иш токтоп калганын белгилеген.
2021-жылдын март айында Жапаров саламаттык сактоо министри Алымкадыр Бейшеналиев менен борбордо болуп, мекеменин курулушун бүтүрүү тапшырмасын берген. Комплексти 2022-жылдын 1-июнунда ачуу пландалып жатат.
Президенттин айтымында, курулуш ишин учурунда "Мээрим" фонду жүргүзүп, "Алтын балалык" деп аталып келген. Бирок кийин "Өмүр булагы" болуп өзгөртүлгөн. Мамлекет башчы тарых өзгөртүлүп жазылбашы керек жана башкалардын эмгеги уурдалбасын деген ой менен комплекстин мурдагы аталышын кайтарууну тапшырган.
Имарат сегиз блок болот: аллергология бөлүмү, онкология, пульмонология, акушердик жана гинекологиялык, балдар хирургиясы, функционалдык диагностика, неврология. Мындан тышкары, эс алуу блогу, клиникалык лаборатория, тамактануу жана кир жуучу жайы каралган.
Комплекс жайгашкан жер боюнча бир нече ирет соттук териштирүүлөр жүргүзүлгөн. 2018-жылы Башкы прокуратура 2000-жылдын декабрь айында жалган токтомдордун негизинде Чолпон-Ата шаардык башкармалыгы менен Ысык-Көл райондук администрациясы комплекстин 2,7 гектарын У.А. аттуу жаранга берип салганын кабарлаган. Мунун айынан ал участок 26 адамга бөлүштүрүлүп, алар үчүнчү адамдарга сатып жиберишкени айтылган.
Прокуратура жергиликтүү бийликтин чечимин жокко чыгарууну суранып, сот доо-арызды канааттандырган. Ысык-Көл райондук администрациясына 2,7 гектар жерди мамлекеттин балансына алуу боюнча буйрук берилген. Бул жердин рыноктук баасы 37 миллион 692 миң сомду түзөт.
Участок мамлекеттин балансына кайтарылып, менчиктеп алган 26 адамдын жерди колдонуу укугу токтотулган.