БИШКЕК, 9-окт. — Sputnik. Тышкы иштер министри Руслан Казакбаев Россиянын Кыргызстандагы элчиси Николай Удовиченко менен эки мамлекеттин президенттери макулдашкан маселелердин ишке кандай ашып жаткандыгын талкуулады. Бул туурасында ТИМдин маалымат кызматынан кабарлашты.
ТИМ башчысы элчи менен бүгүн, 9-октябрда, жолуккан. Алар кыргыз-орус кызматташтыгынын маанилүү делген суроолорун талкуулашкан. Жакынкы аралыкта боло турган министрликтер аралык иш-чараларды тактап, эл аралык жана аймактык маанидеги маселелер боюнча сүйлөшкөн.
Мындан сырткары, мамлекет башчылардын Москва менен Сочиде болгон жолугушуусунун жыйынтыгында жетишилген макулдашуулардын ишке ашуусу тууралуу да кеп кылышкан.