БИШКЕК, 4-окт. — Sputnik. Журналист-иликтөөчүлөрдүн эл аралык консорциуму (ICIJ) "Пандора таржымалы" деп аталган материал жарыялап, анда офшор схемасына тиешеси болушу мүмкүн болгон дүйнөлүк лидерлер тууралуу жазды.
Офшордук компаниялар жана анын чыныгы бенефициарлары тууралуу чет-жакасы белгилүү болгон маалыматтан алынып, жасалган. Анда мындай "эң бай" тизме тарыхта биринчи ирет калкып чыкканы айтылууда. Бир жыл мурда анонимдүү маалымат булагынан ар кыл өлкөлөрдөгү 14 офшордук каттоочунун ички документтери ICIJ уюмунун колуна тийген.
Бул иликтөөнүн авторлору аны финансылык жашыруун маалыматтардын бетин ачкан эң чоң эмгек экендигин айтты. ICIJ уюмунан материалдын ичинде 117 өлкөдөн 600дөн ашык репортаж бар экени белгиленди. Ал 11,9 миллион файлдан турат.
Иликтөөдө мурда мамлекетинде лидерлик тизгинди кармап турган 35 киши жана 400гө чукул аткаминер туурасында айтылган.
Алардын арасында Украина президенти Владимир Зеленскийдин, Иордания падышасы Абдулла IIнин, Азербайжан президенти Ильхам Алиевдин, Чехия премьер-министри Андрей Бабиштин, британиялык мурдагы премьер-министр Тони Блэрдин жана Казакстандын экс-президенти Нурсултан Назарбаевдин ысымдары бар.
ICIJ жакынкы мезгилдерде изилдөөдөн дагы жаңы ысымдарды чыгара тургандыгын четке каккан жок.
"Биз документтерди жарыялоону улантуу ниетиндебиз. Муну кийинки күндөрдө, айларда, ал тургай жылдарда да жасайбыз", — деген ICIJ өкүлү РИА Новости менен болгон маегинде.
Ал 12 миллион документти окуп чыгууга туура келерин кошумчалаган. Бирок муну менен катар эле ICIJ иликтөөдө өтө белгилүү жаңы ысымдар да айтыларын, алардын ичинде дүйнө лидерлери жана бир катар мамлекеттердин жогорку кызматтагы аткаминерлери бар экендигин билдирген.
"Бардыгы биз эмнени аныктаганыбызга жараша болот. Бизге бул 35 кишини (мамлекет башчыларын) таап чыгууга эки жыл кетти, кыязы, дагы бир нерселерди билип иликтеп чыгат окшойбуз, баарын жарыялайбыз", — деген ал.
2016-жылы консорциум Mossack Fonseca юридикалык фирмасынын "Панама документтерин" коомго алып чыккан. Компания кагаздарды тааныбай турганын айтып, журналисттердин бул кадамын "кылмыш" деп баалаган.