БИШКЕК, 25-сен. — Sputnik. ТИМ башчысы Руслан Казакбаев климаттын өзгөрүүсүнүн шартында мөңгүлөрдүн абалына тынчсыздануусун билдирди жана ПРООНду мөңгүлөрдү сактоо боюнча Кыргызстанда долбоорлорду ишке ашырууга чакырды. Бул тууралуу Казакбаев Нью-Йоркто БУУнун Өнүктүрүү программасынын администратору Ахим Штайнер менен жолукканда билдирди.
Казакбаев ПРООНду 2022-жылы "БУУ-Борбордук Азия" саммитин жана "Тоолуу региондорду өнүктүрүү боюнча беш жылдыкты" өткөрүү боюнча президент Жапаровдун демилгелерин жүзөгө ашырууга активдүү катышууга чакырды.
ПРООНдун администратору Ахим Штайнер "Тоолуу региондорду өнүктүрүү боюнча беш жылдык иш-аракеттер" концепциясына киргизилген иш-чараларды колдоого даярдыгын билдирген. Ошондой эле Шотландиянын Глазго шаарында өтө турган БУУнун климаттын өзгөрүшү тууралуу конференциясында Кыргызстанды бийик амбицияларын айтууга чакырган.