Юридикалык жактарды каттоо мыйзамында кандай иш кагаздары керектелери так жазылган. Мисалы, коомдук бирикме же саясий партияларды кайра каттоо үчүн уюштуруучулардын чечими, жетекчи болор адамдын билдирүүсү жана паспорту гана талап кылынат. Бул тууралуу Урмат Акулуев Sputnik Кыргызстан радиосуна маек куруп жатып билдирди.
Анын айтымында, учурда юридикалык жактарды каттоо мыйзамына өзгөртүү киргизүү зарылчылыгы бар.
"Коомдук бирикме же саясий уюмду юридикалык жак катары кайра каттоодо мыйзамда көрсөтүлгөн талаптарды аткарабыз. Анда ошол уюмдун түзүүчүлөрүнүн чечими жана жетекчи болор адамдын билдирүүсү гана керек деп жазылган. Бирок учурда "ал уюмга мүчө эмес болчу, бул жетекчини биз тааныбайбыз" деген өздөрүнүн ички талаш-тартыштарынан улам көптөгөн көйгөйлөр жаралып калган учурлар бар. Мыйзам боюнча кворум сакталдыбы, ким уюмга мүчө, ким жетекчи экенин алар өздөрү чечиши керек. Биз ошол тиешелүү документтерди алып келген учурда каттап кое беребиз. Жогорудагыдай талаш маселелер көп болуп жаткандыктан биз аталган мыйзамга өзгөртүүлөрдү киргизүүнү сунуштадык. Учурда жүрүп жаткан мыйзамдарды инвентаризациялоо ишинде бул дагы бар", — деди Акулуев.
Ал мыйзамга сунушталган өзгөртүүлөр көз карандысыз эксперттер жана тиешелүү адистер менен биргеликте иштелип чыкканын кошумчалады.