БИШКЕК, 27-авг. — Sputnik. Өлкө башчысы Садыр Жапаров суучул Владислав Шуликону Ысык-Көлдү узунунан сүзүп өтүп, дүйнөлүк рекорд жараткан ийгилиги менен куттуктады. Бул тууралуу президенттин маалымат кызматы билдирди.
Мамлекет жетекчиси бүгүн Баткен облусунда иш сапары менен жүрүп Владислав Шуликону телефон аркылуу куттуктаган. Мамлекет башчы суучулду 181 чакырымды сүзүп өтүп, болуп көрбөгөндөй эрдик жасаганын айткан.
"Бардык кыргызстандыктар, анын ичинде мен дагы алты күнгө созулган көлдө сүзүүңүздү сарсанаа болуп карап жаттык. Сиз жараткан рекорд тууралуу кабарды чоң кубаныч жана толкундануу менен кабыл алдым. Сиз биздин чоң сыймыгыбызсыз. Буга чейин мындай аралыкты эч ким сүзүп өтө элек болчу. Сиздин чеберчилик, өжөрлүк жана Мекениңиз — Кыргыз Республикасын таанытууга болгон эркиңиз алдыга коюлган максатка жетүүгө жардам берди", — деген президент сүйлөшүү учурунда.
Эске салсак, кыргызстандык сууда сүзүүнүн чебери Владислав Шулико бүгүн, 27-августта, Ысык-Көлдү узатасынан сүзүп бүтүп, марага жетти. Спортчу аталган кадамын 22-август күнү Каракол пристанынан баштап, Көлдүн бүткөн жери Балыкчыдан аягына чыккан.