БИШКЕК, 12-авг. — Sputnik. Кыргызстандын экс-президенти Сооронбай Жээнбеков Кумтөр иши боюнча УКМКга сурак берди. Бул тууралуу Улуттук коопсуздук мамлекеттик комитетинен билдиришти.
Маалыматка караганда, ведомстволор аралык тергөө тобу 2017-жылы "Кумтөр" долбоору боюнча стратегиялык келишимдин түзүлүшүнө байланышкан окуялардын активдүү этабын баштады.
Комиссиянын жагдайды толук, ар тараптуу жана объективдүү иликтөө максатында айрым жогорку кызмат адамдарынын кылмыштуу иш-аракеттерин иликтөө менен бирге зарыл болгон тергөө жана ыкчам издөө иш-чаралары жүргүзүлүүдө. Буга байланыштуу кылмыш ишине тиешелүү окуялар боюнча 2017-жылы өлкөнүн премьер-министри болуп иштеген экс-президент Сооронбай Жээнбеков 2021-жылдын 12-августунда күбө катары суракка чакырылган.
“Сооронбай Жээнбеков менен тергөө амалдары уланат”, - деп айтылат маалыматта.
УКМКдан тергөө тарабынан күнөөсү аныкталган бардык айыпталуучулардын аракеттерине ээлеген кызматына, сиңирген эмгегине карабастан объективдүү юридикалык баа берилерин белгилешти.