Физиев америкалык Бобби Грин менен үч раунд кармашып, калыстардын чечими менен жеңишке жеткен. Таймаш маалында кыргызстандык мушкер дээрлик үстөмдүк кылып, тыным маалында машыктыруучусуна атаандашы качып жатканын айткан.
Спорттук уюм Физиевдин сокку узатуулары беттештин көбүрөөк көңүл бурдурган учуру деп табылганын жана кармаш эки тараптын тең күйөрмандарын бир топ кызытканын айткан. Көрүүчүлөр Физиев кызыктуу таймаш өткөргөнүн айтып, бул үчүн бонус берүүнү сунушташкан.
Бирок кыргызстандык спортчу кармашына анча ыраазы эместигин, буга салмак түшүрүү процессинде кыйналып калганы үчүн таймашта темпти кармай албаганы себеп экенин айткан.
Кеченин башкы беттешинде Сирил Ган үчүнчү раундда техникалык нокаут менен Деррика Льюисти утту. Бразилиялык Жозе Альдо мекендеши Педру Муньюсту калыстардын бирдей чечими менен жеңди. Ошондой эле АКШлык Майлс Жонс бразилиялык Андерсон дос Сантостон озуп, жеңишин майрамдады.