Сүйүнүч, күйүт, кайнаган эмоция! Кыргыз балбандарынын Олимпиададагы ирмемдери

Кыргызстандын грек-рим жана кыз-келиндер күрөшү боюнча курама командасы Токио-2020 Олимпиадасындагы оюндарын жыйынтыктады.

Бул даңазалуу ири спорттук мелдешке грек-рим күрөшү боюнча Жоламан Шаршенбеков (60 килограмм), Акжол Махмудов (77 килограмм), Атабек Азисбеков (87 килограмм) жана Үзүр Жусупбеков (97 килограмм) катышса, кыздар күрөшүнөн Айсулуу Тыныбекова (62 килограмм), Мээрим Жуманазарова (68 килограмм) жана Айпери Медет кызы (76 килограмм) намыс талашты.

Олимпиада: Кыргызстан медаль боюнча Борбор Азияда алдыңкы сапка чыкты

5 Баш оона 2021, 14:32

Күрөштүн бул эки түрүнөн Олимпиадага барган жети балбандын төртөө медаль үчүн таймашка чыкты. Алардын экөө күмүш, бирөө коло медаль утту.

68 килограмм салмакта мелдешке чыккан Мээрим Жуманазарова Олимпиаданын коло медалын утту. Байге үчүн таймашта ал моңгол кызы Соронзонболдын Батцэцэгдин далысын жерге басып, таза жеңиш менен утту. Мээрим эгемен Кыргызстандын тарыхында Олимпиада медалын тагынган алгачкы балбан кыз болуп калды.

Грек-рим күрөшүнүн чебери Акжол Махмудов 77 килограмм салмакта ат салышып, Олимпиаданын күмүш медалын утту. Алтын байге үчүн финалдык беттеште ал венгриялык тажрыйбалуу балбан Тамаш Лёринцке 2:1 эсебинде жеңишти алдырды.

Балбан кыз Айсулуу Тыныбекова 62 килограмм салмакта күрөшүп экинчи орунду камсыздап, Олимпиаданын күмүш медалын тагынды. Финалдык айыгышкан кармашта япониялык Юкако Каваиге 4:3 эсебинде утулду.

Айсулуу Тыныбекова тарыхта Олимпиаданын күмүш медалын тагынган алгачкы балбан кыз болуп калды.

1 / 15

Кыргызстандык балбан Айпери Медет кызы Токио-2020 Олимпиадасында казакстандык Эльмира Сыздыкованын айласын кетирип жаткан чагы. 1-август, 2021-жыл.

2 / 15

3 / 15

Кыргызстандык балбан Жоламан Шаршенбеков жеңишти алдырган соң жигитчилик сапатын көрсөтүп, атаандашын куттуктап турат. 1-август, 2021-жыл.

4 / 15

Айпери Медет кызы беш жолку дүйнө чемпиону, америкалык тажрыйбалуу балбан Аделина Грейге акыркы дем-күчү менен чабуул коюп жатат. 2-август, 2021-жыл.

5 / 15

Кыргызстандык балбан, грек-рим күрөшүнүн чебери Акжол Махмудов (77килограмм) тунистик Ламджед Маафини ай-буйга келтирбей төрт упайлык ыкмага чапканы жатат. 2-август, 2021-жыл.

6 / 15

Мээрим Жуманазарова (68 килограмм) Олимпиада мелдешинин чейрек финалында кара күчкө бай нигериялык (көк кийимчен) Блессинг Оборудудуга каршы партерде коргонуп жатат. 2-август, 2021-жыл.

7 / 15

Акжол Махмудов армениялык Карапет Чалянды жерден көтөрүп артка ыргыткан ыкмасына каршы амал жасап, эки упай алды. Жарым финалдык беттештин эң маанилүү учуру... Жеңиш Акжол тарапта болду. 2-август, 2021-жыл.

8 / 15

Кыргыздын атактуу балбан кызы Айсулуу Тыныбекова (кызыл кийимчен) румыниялык Криста Инкзеден эки упай алып эле токтобостон, анын бутун кайчылаштырып тоголото ыкмага салганы жаткан учуру. 3-август, 2021-жыл.

9 / 15

Айсулуу Тыныбекова (кызыл кийимчен) украиналык балбан кыз Ирина Коляденкону утуп, Токио-2020 Олимпиадасынын финалына чыккан чагы. 3-август, 2021-жыл.

10 / 15

Кыргыз балбаны Акжол Махмудов (көк кийимчен) Олимпиаданын финалында венгриялык тажрыйбалуу спортчу Тамаш Лёринцке жеңилгенин жигитче мойнуна алууда. Өз кезегинде олимпиада чемпиону Акжолдун оңой эмес атаандаш болгонун айтып жатат. 3-август, 2021-жыл.

11 / 15

Кыргыз балбаны Акжол Махмудов болгону 22 жашында спорт дүйнөсүнүн туу чокусу болгон Олимпиада оюндарынын күмүш медалын тагынып турат. 3-август, 2021-жыл.

12 / 15

Кыргыздын балбан кызы Мээрим Жуманазарова (кызыл кийимчен) саналуу секунд мурда Олимпиаданын коло байгеси үчүн беттеште моңгол кызы Соронзонболдын Батцэцэгдин далысын жерге басып, таза жеңиш менен утту. Сүрөттө ийгилигине чексиз ыраазы болуп турган чагы. 3-август, 2021-жыл.

13 / 15

Ажарлуу балбан кыз Мээрим Жуманазарова Олимпиаданын коло медалын тагынып, талыкпаган эмгектин үзүрүн, жеңиштин даамын татып турган жагымдуу учуру. 3-август, 2021-жыл.

14 / 15

Кыргыздын баатыр кызы Айсулуу Тыныбекова (кызыл кийимчен) Олимпиаданын алтын байгеси үчүн таймашта ар бир упай үчүн жан үрөп, япониялык атаандашы Юкако Каваинин (62 килограмм) чабуулунан коргонуп жаткан чагы. 4-август, 2021-жыл.

15 / 15

Айсулуу Тыныбекова Олимпиаданын күмүш медалын тагынып турган кези. Сыйлоо аземи. 4-август, 2021-жыл.