БИШКЕК, 7-июл. — Sputnik. Диетолог Татьяна Разумовская спорт менен машыкпаган жана диетага отура албагандар үчүн ашыкча салмактан арылуунун жолдорун айтты. Адистин кеңештери РИА Новостиге жарыяланды.
Диетолог арыктоодо уйку өтө маанилүү роль ойнорун белгиледи.
"Эгер уйку мезгил-мезгили менен үзгүлтүккө учурап, канбай калса, табитти басаңдаткан лептин гормонунун деңгээли азайып, адамды ачка кылган герлин менен кортизол гормондору көп бөлүнүп чыга баштайт. Кортизол гормону бөлүнүп чыкканда адам тамакты көп жеп, курсак тарапты май басат", — деген адис.
Спорту жок арыктайм деген киши тамактануу рационуна клетчатканы кошкону оң экени айтылды. Маалым болгондой, андагы булалар канда холестерин менен канттын деңгээлин жөнгө салып, ичегиге оң таасир тийгизет.
"Күнүнө 20-40 граммдан курамында клетчатка бар тамак жеш керек. Ошондой эле кургатылган жер-жемиш, жаңгактын, ботконун түрү, жашылча да ашыкча болбойт. Арыктоодо белок да маанилүү. Мейли сүт азыктары, эт, балык, жумуртка болсун, сөзсүз жеп туруш керек", — деди диетолог.
Белгилей кетсек, клетчатка жемиштердин ичинен кургатылган өрүктө (100 граммга 18 грамм), кургатылган алмада (14,9 грамм), кара өрүктө (9 грамм), авокадодо (6,8 грамм), курмада (алты грамм) көп болот. Ал эми жашылчалардын ичинен брокколиде (3 грамм), баклажан жана кызылчада (2,5 граммдан) мол болот. Бул тууралуу буга чейин онколог жана проктолог Елена Смирнова билдирген.