БИШКЕК, 22-июн. — Sputnik. Учурда Бишкек шаардык соту мурдагы премьер-министр Өмүрбек Бабановдун бөгөт чарасын өзгөртүү боюнча маселени карап, райондук соттун 31-июлга чейин камакта калтыруу чечимин күчүндө калтырды. Бул тууралуу Бишкек шаардык соту билдирди.
Сот имаратынын алдына саясатчынын 500гө жакын тарапташы келген.
Белгилей кетсек, Өмүрбек Бабанов Кумтөр боюнча козголгон кылмыш иштин алкагында кармалып, 2-июнь күнү эки айга УКМКнын тергөө абагына киргизилген. Биринчи май райондук соту мурдагы премьерди 31-июлга чейин УКМКнын тергөө абагына киргизген. Кийин жактоочусу аны үй камагына чыгаруу боюнча апелляциялык арыз жазган.
Кабарчынын айтымында, эл шаардык сот райондук соттун чечимин күчүндө калтырды деп угуп, "Бабановго боштондук!" деп кыйкыра баштады.