Жыл сайын эң жакшы окуган балдар үчүн өткөрүлчү "Алтын тамга" аттестациясына быйыл Баткен жана Лейлек районунун окуучулары катышпайт. Мындай чечимди Билим берүү жана илим министрлиги кабыл алды. Бул тууралуу Кылым Сыдыкназарова Sputnik Кыргызстан радиосуна маек куруп жатып билдирди.
Анын айтмында, аталган эки райондун мыкты жетишкендиктерди көрсөткөн окуучуларына артыкчылык аттестаттары ("кызыл" аттестат — ред.) автоматтык түрдө берилет.
"Жакында эле болуп өткөн чек ара окуясына байланыштуу быйыл Баткен жана Лейлек районунун эң жакшы окуган балдарын "Алтын тамга" аттестациясынан өткөрбөй эле коюуну чечтик. Анткени бул эки райондун көпчүлүк айылдарынын окуучулары психологиялык жактан жабыр тартып, материалдык чыгымга туш болгон үй-бүлөлөрдөн. Алар 11 жыл бою жакшы окуп келип эле жогорудагы окуяга байланыштуу тесттен өтпөй калуу коркунучу бар. Андыктан бул балдар мектепти артыкчылык менен бүтүргөндүгү тууралуу күбөлүктөрдү автоматтык түрдө алышат. Ал эми республиканын башка аймактарындагы окуучулар жылдагыдай эле аттестацияга катышат. "Алтын тамга" 28-майда Ош жана Жалал-Абад облустарында өткөрүлөт. Былтыр ага 2000ден ашуун окуучу катышкан, быйыл деле ушунча бүтүрүүчүнүн катышары болжолдонууда", — деди Сыдыкназарова.
Педагог "Алтын тамга" аттестациясы эпидемиологиялык эрежелерди сактоо менен офлайн-режимде өтөрүн кошумчалады.