2018-жылы Кыргызстанда 20 жаштагы Бурулай Турдали кызынын Жайыл райондук милиция бөлүмүндө өлтүрүлүшү төбө чачты тик тургузган. ИИМ бул окуяны "кыргыз милициянын бардык кызматкерлеринин кадыр-баркына көө жапты" деп баалаган. Мамлекет башчы дагы буга күнөөлүүлөрдү жоопко тартуу талабын койгон. Мындан улам Ички иштер министрлиги 23 милиционерди жазалаган.
Sputnik Кыргызстандын кабарчысы ИИМге кайрылып, Бурулайдын өлүмүнө байланыштуу кызматтан бошотулган тартип сакчыларынын канчасы кайра иштеп жатканын сурады.
Сегиз кызматкер иштен алынган:
Министрликтин маалыматы боюнча, жогоруда аталгандардын бешөө учурда милицияда иштеп жатат.
"Полковник Канат Жумаев, полковник Марлис Асанов, полковник Муратбек Исмаилов, кенже лейтенант А. Аблабеков жана подполковник Т. Ниязалиев учурда ички иштер органдарында иштеп жатат", — деп жазылган ИИМдин жообунда.
Бирок кандай кызматты аркалап жатканы айтылган жок. Ачык булактардагы маалымат боюнча, Марлис Асанов учурда Талас облустук милициянын башчысынын милдетин аткарып жатат.
Ал эми полковник Нурлан Сарчаев, лейтенант Эржан Кадышев жана улук лейтенант Т. Макашов кызматтан биротоло кеткен. ИИМ иштен алынган Жайыл райондук милициянын беш кызматкери азыр милицияда иштебей жатканын айтты. Алар РИИБдин жетекчисинин орун басары Ж. Абыканов, нөөмөт бөлүмү боюнча улук инспектор Ильич Иманалиев, нөөмөт бөлүмүнүн милиционери Н. Эсенкулов, нөөмөт бөлүмүнүн кайтаруу тобунун милиционерлери Мирлан Макеев жана А. Атакулов.
Эске салсак, 2018-жылы 28-майга караган түндө Кыргызстанда төбө чачты тик тургузган окуя болгон. Ошол түндө 30 жаштагы киши Чүй облусуна караштуу Жайыл районунун ички иштер бөлүмүндө ала качып алган кызын бычактап, кийин өзүнө да кол салган. Бурулай алган жараатынан улам каза болуп, эркек киши ооруканага түшкөн.
Кийин сот болуп кызды ала качкан Марс Бөдөшев 20 жылга, окуяга катышкан Акмат Сеитов жети жылга эркинен ажыратылган.
Ал эми айып тагылган милиция кызматкерлери Ильич Иманалиев, Эржан Кадышев жана Мирлан Макеевдин ар бири 260 миң сомдон айыпка жыгылган. Мындан сырткары, жоопко тартылгандар Бурулайдын ата-энесине 100 миң сомдон компенсация төлөп берүүгө милдеттендирилген. Сот мындай чечимин айыпталуучулардын буга чейин кылмыш жоопкерчилигине тартылбаганы менен түшүндүргөн.