БИШКЕК, 24-май — Sputnik. Бишкек шаарында жана Чүй облусунда күз-кыш мезгилине даярдык көрүүнүн алкагында электр чубалгыларынын 10 миңден ашык обочолоткучу (изолятор) алмаштырылат. Бул тууралуу "Кыргызстан улуттук электр тармагы" ААКсынын маалымат кызматы кабарлады.
Билдирүүгө караганда, обочолоткучтар электр чубалгысынын ажырагыс элементи болуп саналат. Алар зымдын тирөөчтөргө бекиген жерлерин сактап, чубалгыны туташып калуудан коргойт.
Мурдагы фарфор обочолоткучтарды айнекке алмаштыруу пландалып жатат.
"Айнек бышык келип, температуранын кескин өзгөрүшүнө туруштук берет. Электр чубалгыларынын эски фарфор обочолоткучтары 1958-жылы, ал эми эң эле жаңылары 1980-жылы чыккан. Иштөө мөөнөтү 7-8 жылды түзгөндүктөн, алардын эксплуатациялык мөөнөтү мурда эле өткөн", — деди мекеменин Чүй филиалынын башкы инженери Улан Жумалиев.
Анын айтымында, обочолоткучтарды алмаштыруу боюнча иштер биринчи кезекте керектөөчүлөрдү электр энергиясы менен камсыздоонун сапатын жогорулатууга багытталган.