БИШКЕК, 22-май — Sputnik. Муздаткыч өчкөндүктөн жараксыз болуп калган вакцинадан улам №2 үй-бүлөлүк медицина борбору менен Ленин районуна караштуу №1 үй-бүлөлүк бириктирилген медицина борборунун жетекчилери кызматтан алынды. Бул тууралуу саламаттык сактоо жана социалдык өнүктүрүү министри Алымкадыр Бейшеналиев билдирди.
Буга чейин шаардагы №2 үй-бүлөлүк медицина борборунда муздаткыч өчүп калып 994 доза вакцина жараксыз болуп калганы айтылган. Анын чыгымы 840 миң сом болгон. Республикалык иммунопрофилактика борборунун жетекчиси Гүлбара Ишенапысова окуя 30-апрель күнү болгонун айтып, жарабай калган препараттарды эсептен чыгаруу туура келгенин билдирген.
Шаардык саламаттыкты сактоо башкармалыгы ал мезгилде үй-бүлөлүк медицина борборунун жетекчилигин жазалап, сөгүш берген.
Министрдин айтымында, №1 жана №2 үй-бүлөлүк медицина борборлорунун жетекчилери вакцина маселесинен улам эми кызматтан кетти.
Бейшеналиев №1 үй-бүлөлүк бириктирилген медицина борборунун жетекчиси Ленин районундагы эмдөөгө жооптуу болгондуктан иштен алынганын белгиледи.
Эске салсак, "Спутник V" вакцинасынын алгачкы 20 миң дозасы Кыргызстанга 22-апрелде алып келинген. Жалпысынан Кыргызстан Россиядан препараттын миллион дозасын алуусу күтүлүүдө. Анын ичинде 500 миңи гуманитардык жардам түрүндө келет.