Интенсивдүү багбанчылык, күнөскана, тамчылатып сугаруу сыяктуу айыл чарбасындагы жаңы тенденцияларды өнүктүрүү зарыл. Мындай пикирин Бактыяр Медетбек уулу Sputnik Кыргызстан радиосунун эфиринде маек учурунда билдирди.
Анын айтымында, айыл чарбасынын өнүгүшүндө тармакты санариптештирип, дыйкандарга маалыматтын жеткиликтүүлүгүн колго алуу кажет.
"Айыл чарбасы — мамлекеттин экономикасынын негизин түзгөн тармактардын бири. Ага карабастан көйгөйлөр абдан көп. Бул тармак азыркы учурда түздөн-түз жаңы тенденцияларга, жаңы өнүгүү жолуна муктаж. Анын негизги максаты — жер, суу, энергия ресурстарын оптималдуу пайдалануу менен көп түшүм алуу. Учурда дүйнөдөгү эң орчундуу көйгөй — ачкачылык, тамак-аштын жетишсиздиги. Көп өлкөлөрдө жаңы тенденциялар аркылуу көп түшүм алып, жаңы багыттарды ачып жатышат. Андыктан интенсивдүү багбанчылык, күнөскана, тамчылатып сугаруу сыяктуу технологияны жайылтуу керек. Айыл чарбасынын өнүгүшүндө тармакты санариптештирип, дыйкандарга маалыматтын жеткиликтүүлүгүн колго алуу кажет", — деди Медетбек уулу.
Ошондой эле адис дүйнө калкынын санынын өсүүсү орчундуу көйгөй болгондуктан суу, шамал, жер ресурстарын пайдалануу менен тамак-аш жетишпестигин жоюу зарылчылыгы бар экендигин кошумчалады.