Коомчулукта элечекти жашы улгайгандар киет деген жаңылыш пикир калыптанып калган. Чынында аны турмушка чыккан аял гана кие алат. Бул тууралуу Дөөлөт Рысбаев Sputnik Кыргызстан радиосуна маек берип жатып билдирди.
Анын айтымында, кыргыздар көчмөн эл болгондуктан элечектин кездемесин ар кандай жагдайда колдонгон.
"2005-жылдан бери атайын улуттук сынак өтүп келет. Ал иш-чарага буга чейин бир нече жолу катышканбыз. Быйыл аялзатынын улуттук баш кийимине арналган "Элечек" деген китеп менен баш байгени багынта алдык. Аталган китепте аймактык, уруулук, чет жактардагы кыргыздардын өзгөчөлүгү көрсөтүлүп, жалпысынан элечектин 20 түрү бар. Салттуу билимдин алып жүрүүчүлөрү, тарыхый сүрөттөр, этнографиялык маалыматтардын негизинде жазылган. Анткени элечекти ороодо ар бир аймактын өзгөчөлүгү болгон. Аларды адаштырбай жеткирүү зарыл. Элечектин өзүнүн маани-маңызы, тарых-таржымалы бар. Кыргыз эли көчмөн болгондуктан зарылчылык жаралган учурда анын кездемеси кепин катары колдонулган. Мындан тышкары, бала төрөлүп калса, аны орогонго же жарат алгандарды таңуу үчүн дагы пайдаланылган. Соңку убактарда элечекти жашы улгайгандар эле киет деген жаңылыш пикир калыптанып калды. Чынында аны турмушка чыккан аял гана кийген. Кийин Союз учурунда талаа иштерине аялдар дагы чыгып калганда элечек ыңгайсыздык жаратып, чечүүгө мажбур болушкан. Ал эми улгайган аялдар үйдө отургандыктан алар кийип жүрүшкөн. Мындан улам жогорудагыдай пикир элге сиңип кеткен", — деди Рысбаев.
Ошондой эле ал китеп үч тилде жарык көргөнүн кошумчалады.