БИШКЕК, 27-апр. — Sputnik. Президент Садыр Жапаров "Эскерүү багы" акциясынын алкагында Бишкектеги Балдарды жана үй-бүлөнү реабилитациялоо адистештирилген борборуна (балдар үйү — ред.) көчөт отургузду. Бул тууралуу өлкө башчынын маалымат кызматынан билдиришти.
Анда президент иш-чара Улуу Ата Мекендик согуштагы жеңиштин 76 жылдыгына арналганын айтып, жеңиштин дүйнө тарыхына тийгизген таасиринин маанисине токтолду.
"Жеңишке жетүүдө согуш талааларында курман болгон ата-бабаларга, тылдагы эмгекчилерге таазим этебиз. Аталардын жана чоң аталардын эрдиги, баатырдыгы кыргыз элинин эсинде түбөлүккө сакталып калат", — деди Жапаров.
Өлкө башчы бардык мамлекеттик түзүмдөрдүн, жергиликтүү бийлик органдарынын жетекчилери менен кызматкерлерин, өлкөнүн катардагы жарандарын бул акцияга катышып, ата-бабалардын элесине таазим этип, ошондой эле аймактарды жашылдандырууга салым кошууга чакырды.