БИШКЕК, 18-апр. — Sputnik. Абдылас Малдыбаев атындагы Кыргыз улуттук академиялык опера жана балет театрынын чоң сахнасында 20 жылдан ашык убакыттан кийин "Ак Мөөр" опера-дастаны кайрадан жаңыртылып коюлду. Бул туурасында Маданият, маалымат жана жаштар саясаты министрлиги билдирди.
Премьерага президенттик аппараттын жетекчиси Сүйүнбек Касмамбетов, биринчи вице-премьер Артем Новиков, өкмөт мүчөлөрү жана жалпы коомчулук катышкан.
Опера-дастандын дирижёру КР эл артисти Жумакадыр Каниметов болсо, койгон режиссёру Искендер Сартбаев. Ал эми сүрөтчүсү КР эл артисти Маратбек Шарафидинов, балетмейстер-коюучусу Тилек Кийизбаев, хормейстери КР эмгек сиңирген артисти Карагул Тиленчиев. Либреттону КР эл акыны Акбар Рыскулов жазган.
Каармандардын формалары жаңыртылып, чыгармачыл курам дагы өзгөртүлгөнү айтылат.
Ак Мөөрдүн ролун Айзирек Момунова, Болотту Тилек Найманбаев, Жантай ханды Кайымбек Кускаков, Күлүйпаны Гүлнур Ниязбаева аткарган.
Министр Кайрат Иманалиев соңунда чыгармачыл жамаатка опера-дастанды жогорку деңгээлде эл алдына алып чыккандыгын өзгөчө белгилеп, ыраазычылык билдирген.
Эске салсак, "Ак Мөөр" опера-дастаны алгачкы жолу кыргыз сахнасында Керим Турапов Болоттун, Эсенбүбү Нурманбетова Ак Мөөрдүн ролун аткарышып элге тартууланган.