БИШКЕК, 15-апр. — Sputnik. Кыргызстандык белгилүү балбан Айпери Медет кызы Казакстандын Алматы шаарында өтүп жаткан Азия чемпионатынын финалында жеңилип, күмүш медаль алып калды. Бул тууралуу Бириккен күрөш дүйнөсүнүн (UWW) сайтында жазылды.
Спортчу кыз 76 килограмм салмактагылар арасында күчүн сынады. Ал төрт кармаш өткөрүп, финалда казакстандык Элмира Сыздыковага утулуп калды.
Интернеттеги спорттук баракчалар жүктөгөн видеодон Медет кызы медаль тагынып жатып көзүнө жаш алганын көрүүгө болот.
Медет кызы жакында эле лицензиялык турнирди жеңип, Токио Олимпиадасына жолдомо уткан. Кыска убакытта кайра Азия чемпионатында күрөштү.
Олимпиада оюндарына лицензия бере турган турнир учурда Алматы шаарында өтүүдө. Азия чемпионаты да ушул эле шаарда 13-18-апрель күндөрү болууда.