БИШКЕК, 25-мар. — Sputnik. Өкмөт үйүнүн алдында Ак-Ордо, ТЭЦ-2 жаңы конуштарынын жер тилкелерин мыйзамдаштырууну талап кылган адамдар митинг өткөрүп жатат. Бул тууралуу Sputnik кабарчысы жеринен билдирди.
Чогулган эл мындай өтүнүч менен президент Садыр Жапаровго жолугууну көздөөдө. Алардын айтымында, митингчилер жашаган бул жерлер 16 жылдан бери мыйзамдашпай келет.
"2005-жылы Бишкек шаарынын Ленин акимиатынын чечими менен үй курууга уруксат кагаздарын алганбыз. Өткөн жумада премьер Марипов социалдык тармактардагы 400дөй үй көчүрүлөрүн айтты. Бирок ал жерде миңге жакын түтүн жашайт. Баарыбыздын колубузда үй курууга уруксат берилген акимиаттын мыйзамдуу кагаздары бар. Өкмөт көптөн бери жерди мыйзамдаштырып беребиз деген убада берип келет, бирок чечим жок. Ошондуктан бүгүн акыркы үмүтүбүз менен президент Садыр Жапаровго кайрылууга келдик", — деди аталган конуштардын биринде жашаган Абдырахман Дүйшөналиев.
Учурда митингге топтолгондордун саны 100гө жетти.
Эске салсак, өткөн жумада премьер Улукбек Марипов Бишкектин четиндеги ТЭЦ-2 ишке кире турган болсо 400дөй үй-бүлөнү көчүрүүгө туура келерин билдирген.
"Мен картадан карап көрдүм, ТЭЦ-2нин 40 гектардай аймагына жаңы конуштар түшүптүр. Эгер биз жылуулук борборун ишке киргизсек, 400дөй үйдү көчүрүүгө туура келет. Бул чоң көйгөй. ТЭЦтин оң жагында карьер бар, текшерүүчү органдар тийиштүү жерлерге көз салса жакшы болмок", — деген ал.
ТЭЦ-2 Бишкектин түндүк-батышында, Сокулук районунда жайгашкан. Анын курулуш иштери 1986-жылы башталып, кийин токтоп калган. 2019-жылы өкмөт бул ТЭЦти калыбына келтирүү маселеси каралып жатканын билдирген. Ал эми экс-мэр Азиз Суракматов Sputnik Кыргызстан агенттигине берген маегинде ТЭЦ-2ни реконструкциялоо жана модернизациялоону тездетүү зарылдыгын билдирип, ишкана газ менен иштеши керектигин кошумчалаган.