БИШКЕК, 15-мар. — Sputnik. Боом капчыгайындагы адам өмүрүн алган жол кырсыкка тайгак жол себеп болушу мүмкүн. Бул тууралуу Sputnik агенттигине Чүй облустук жол кыймылы коопсуздугун камсыздоо башкармалыгынан билдиршти.
Жол кырсыгы кечээ, 14-мартта, саат 19:00дө Бишкек — Нарын — Торугарт жолунда болгон. Mazda 626 үлгүсүндөгү унаа парапетти сүзүп кеткен.
ЖКККБнын маалыматына караганда, машина Бишкекти көздөй бараткан. Кырсыктын кесепетинен 25 жана 26 жаштагы эки жүргүнчү көз жумган.
Учурда окуянын чоо-жайы такталып жатат. Эске салсак, аба ырайынын бузулушунан жолдорго муз тоңуп, Боом капчыгайында унаа тыгыны жаралган.