БИШКЕК, 11-мар. — Sputnik. Россиянын тышкы иштер министри Сергей Лавров Түркиянын тышкы иштер министри Мевлют Чавушоглу менен Катардын борбору Дохадагы эл аралык аэропорттон жолугуп сүйлөшүп жатканын РИА Новости жазды.
Россиялык министр Эр-Рияддан, түрк министри Бишкектен барган. Чавушоглу 10-мартта Кыргызстанга келип өлкө жетекчилиги менен кезиккен.
"Кыргызстандан сувенир ала келдиңизби?" — деп Лавров түрк кесиптеши менен учурашып жатып тамашалады.
Ошондой эле ал Чавушоглудан "Аккую" АЭСинин курулушунун трансляциясынын көргөн-көрбөгөнүнө кызыккан.
"Бир аз. Бишкектен учуп кетишим керек болгондуктан толук көрө албай калдым", — деди түрк министри.
Тараптар кийинки сүйлөшүүлөрүн жабык форматта өткөрүшкөн.