БИШКЕК, 10-мар. — Sputnik. Кыргыз режиссёру Артыкбай Сүйүндүковдун "Шамбала" тасмасы "КМШ жана Балтика өлкөлөрүнүн мыкты фильми" номинациясы боюнча "Ника" киносыйлыгына көрсөтүлдү. Бул тууралуу Кинематография департаментинен кабарлашты.
Фильмдин дүйнөлүк премьерасы 2020-жылы июль айында Шанхайда өткөн эл аралык фестивалда болгон. Тасма Чыңгыз Айтматовдун "Ак кеме" повестинин негизинде тартылган.
"КМШ жана Балтика өлкөлөрүнүн мыкты кинокартинасы" наамына Өзбекстан, Казакстан жана Азербайжандагы режиссёрлордун эмгектери да ат салышары айтылды.
"Ника" киносыйлыгы 1987-жылы СССРдин кинематографисттери тарабынан түптөлгөн, негиздөөчүсү – Юлий Гусман. Киносыйлыктын жеңүүчүлөрү Кинематография искусствосу академиясынын мүчөлөрүнүн жашыруун берген добушу аркылуу аныкталат.
"Шамбала" фильми буга чейин бир нече эл аралык кинофестивалдарга катышкан.