БИШКЕК, 19-фев. — Sputnik. Кыргызстанда бир нече адамдын автоунааларын үчүнчү тарапка сатып качып кетти делген жаран Алматыдан кармалды. Бул туурасында ИИМдин маалымат кызматы билдирди.
Кармоо боюнча операцияга Алматы шаарынын Полиция департаментинин Криминалдык милиция башкармалыгынын кызматкерлери КР ИИМинин Криминалдык милиция кызматынын Уюшкан кылмыштуулук менен күрөшүү башкармалыгынын кызматкерлери тартылган.
Кыргызстанда бир нече адамдын автоунааларын үчүнчү тарапка сатып качып кетти делген жаран Алматыдан кармалды
© Фото / пресс-служба МВД КР
"Шектүү 1986-жылы туулган Б.М. аттуу Бишкек шаарынын тургуну. Ленин райондук милициясы тарабынан издөөгө алынган. Ал уюшкан кылмыштуу топтун мүчөсү катары ИИМдин каттоосунда турат. Бир нече кылмыш жасагандан кийин жашырынуу үчүн чет өлкөгө качып кеткен", — деп айтылат маалыматта.
Шектүү Алматы Полиция департаментинин убактылуу кармоочу жайына киргизилген. Учурда КРге экстрадициялоо боюнча маселелер чечилип жатат.
Кармалган жаран төмөнкү кылмыштарга шектелүүдө:
Б.М. аттуу киши 2018-жылдын ноябрь айында Toyota Camry автоунаасын 6400 долларга сатып алып, ээсине акчасын бөлүп төлөөнү убадалаган. Бирок шектүү машинаны үчүнчү тарапка сатып качып кеткен.
2018-жылдын октябрында Бишкек шаарынын тургунуна Mercedes-Benz E430 автоунаасын 8000 долларга сатып, кийинчерээк документин жасап берем деген шылтоосун айткан. Бирок бир жумадан кийин шектүү машинаны кайтарып алып, 5000 долларын карматат да, калган акчаны кийин берем деп алдап кеткен.
Андан соң 13 500 долларлык Honda CR-V, 10 000 долларлык Ford Transit, 4000 долларлык Nissan Maxima үлгүсүндөгү автоунааларды алдоо жолу менен алып, үчүнчү тарапка сатып жиберген. Жабырлануучулар тарткан зыяндын суммасы 27 миң долларды түздү.
Көп өтпөй эле кайра алдамчылык менен алган Toyota Camry унаасын башка бирөөгө 5 900 долларга сатып жиберген.
2019-жылдын февраль айында iPhone XS үлгүсүндөгү телефонду 83 800 сомго бөлүп төлөө шарты менен алган. Ал жубайына белек кыларын айткан. Баштапкы төлөм катары 20 000 сом берип, ошол бойдон из жашырып кеткен.
ИИМ кармалган жарандын жогоруда айтылган фактылардан башка дагы алдамчылык иш-аракеттери бар экенин белгиледи.