Улуусу 61, кичүүсү 34 жашта. Жаңы өкмөт мүчөлөрүнүн жаш курагы, билими

Маалым болгондой, өкмөттүн жаңы курамында өтө деле жаштары жок. Эң кичүүсү — биринчи вице-премьер Артем Новиков. Быйыл 34 жашка чыгат. Калган бөлүгү орто жашап калгандар. Ал эми алган билими боюнча ар тармактын өкүлдөрү бар. Арасында экономист, юристтери көбүрөөк.

Жаңы тандалган өкмөт башчы быйыл 42 жашка толот. Марипов эки окуу жайды бүтүргөн. Бири Оштогу техникалык университет, экинчиси Ош мамлекеттик университети. Ал финансы, кредит, юриспруденция адистигин аяктаган.

Өкмөттөгү эң жаш кадрлардын бири Артем Новиков быйыл 34 жашка чыгат. Ал Балтика мамлекеттик техникалык университетин аяктаган. Кесиби — экономист-менеджер.

Өкмөттүн аппаратын жетектей турчу аткаминер быйыл 40 жашка чыгат. Ал Жусуп Баласагын атындагы Кыргыз улуттук университетинде, Кыргыз мамлекеттик юридикалык академиясында жана Президентке караштуу мамлекеттик башкаруу академиясында окуган. Кесиби — юрист.

Бир нече агенттик жана министрликтердин милдети дал ушул адамга жүктөлдү. Кармышаков быйыл 58 жашка толот. Ал Фрунзе финансы-экономикалык техникумун жана Кыргыз мамлекеттик университетинин экономика факультетин артыкчылык диплому менен аяктаган. Мындан сырткары, бир нече чет өлкөлөрдө финансы маселелери боюнча окуу семинарларына катышкан. Кесиби — экономист.

Ордун сактап калган Руслан Казакбаев 54 жашта.  1991-жылы Фрунзенин политехникалык институтун, 2002-жылы Кыргыз улуттук университетинин юридикалык факультетин, ал эми 2004-жылы Тышкы иштер министрлигинин алдындагы Дипломатиялык академияны аяктаган.

Кайрадан түзүлгөн Коргоо министрлигин жетектөө милдети Таалайбек Өмүралиевге жүктөлдү. Ал быйыл 56 жаштын чайын ичет.

1982-1986-жылдары Маршал Конев атындагы Алматы жалпы аскердик командалык жогорку окуу жайында окуган. Мындан тышкары, РФ Куралдуу күчтөрүнүн Фрунзе атындагы жалпы аскер академиясын, Россиянын Генералдык штабынын аскер академиясын бүткөн.

Аскар Жаныбеков 57 жашта. Ал Кыргыз айыл чарба институтунда агроном-мелиоратор адистиги боюнча билим алган. Мындан сырткары, Жусуп Баласагын атындагы КУУну юриспруденция, Касым Тыныстанов атындагы Ысык-Көл мамлекеттик университетинде ветеринар адистиги боюнча окуган.

Турдубаев быйыл 49 жашка чыгат. Министр Исхак Раззаков атындагы университетти "электр станциялары" адистиги боюнча 2001-жылы аяктаган. Кийин "Кыргыз энерго" ишканасынын окуу борборунан "Электроэнергетикадагы жогорку жыштыктагы байланыш жабдуулары" курсунан өткөн. Андан соң Венгриянын Будапешт шаарында "Өткөөл экономика шартында энергетика тармагын жөнгө салуу" курсунда окуган.

Улан Ниязбеков 46 жашта. Ал Жусуп Баласагын атындагы Кыргыз улуттук университетинин юридикалык факультетин аяктаган.

Абдралиева быйыл 49 жашка чыгат. Ал Исхак Раззаков атындагы Кыргыз мамлекеттик техникалык университетинин "Технология жана тигүү буюмдарын конструкциялоо" адистигин аяктаган.

Ажикеев 56 жашта. Эки жогорку билими бар. Бири — "инженер-куруучу", экинчиси — "бухгалтердик эсеп жана аудит".

47 жаштагы Асел Чынбаева Жусуп Баласагын атындагы Кыргыз улуттук университетинде укук таануучу адистигин аяктаган. Кесиби — юрист, укук таануучу.

Кайрат Иманалиев 44 жашта. Ал үч окуу жайдан билим алган. Алгач Жусуп Баласагын атындагы Кыргыз улуттук университетинин журналистика факультетин бүтүрүп, кийин ушул эле окуу жайда магистратурада окуган. Президенттин алдындагы мамлекеттик башкаруу академиясын да аяктаган. Драматург.

Алмазбек Бейшеналиев быйыл 40 жашка чыгат. Ал Нарын мамлекеттик университетинин филология факультетинен англис тили жана адабияты боюнча билим алган. Кийин Германияда немец тили боюнча курста окуган. Ушул эле мамлекетте PH-Ludwigsburg педагогикалык университетинде магистрлик даража ыйгарылган (дидактика жана англис тили). Бейшеналиев Ишеналы Арабаев атындагы Кыргыз мамлекеттик университетинде аспирантурада жана докторантурада окуган.

Саламаттык сактоо министри быйыл 61ге толот. Ал Кыргыз мамлекеттик медициналык институтунун "дарылоо иши" адистигин аяктаган. Андан соң ошол эле окуу жайдын клиникалык ординатурасында билим алган. 1989-жылы кандидаттык, 2000-жылы докторлук диссертациясын коргогон.

Ташиев быйыл 53 жаштын чайын ичүүдө. Атайын органдын төрагасы Томск мамлекеттик университетинин "инженер, химик-технолог" адистигин аяктаган. Кыргыз улуттук университетин да бүтүргөн.