БИШКЕК, 2-фев. — Sputnik. Ысык-Көл облусунда эки адамдын өлүмүнө шектелген адамга издөө жарыяланды. Бул тууралуу облустук милициянын маалымат кызматы билдирди.
Окуя болгон жерге барган тергөө-ыкчам тобу айтылган даректеги үйдөн киши колдуу болгон эне-баланын сөөгүн табышкан. Кылмышка шектүү жаран качып кеткен.
Бул факт Кылмыш жана жоруктардын бирдиктүү реестрине Жазык кодексинин 130-беренеси ("Адам өлтүрүү") боюнча катталып, сотко чейинки өндүрүш башталган.
"Алдын ала териштирүү иштерин жүргүзүү учурунда кылмышка шектүүнүн ким экени аныкталып, издөөгө алынды", — деп айтылат маалыматта.
Азыркы учурда Ысык-Көл облустук милиция кызматкерлери тарабынан экспертизалар дайындалып, кылмышка шектүү жаранды кармоо боюнча тиешелүү аракеттер көрүлүп жатканы кабарланды.