БИШКЕК, 25-янв. — Sputnik. Коронавируска чалдыккан учурда көпчүлүк адамдардын жыт жана даам сезүүсү жоголуп кетет. Аларды кантип тез калыбына келтирүү жолдорун Sputnik радиосуна берген маегинде невролог жана нейрофизиолог Александр Будик түшүндүрдү.
COVID-19 маалында жыт менен даам сезүү эмне себептен жоголуп кетери акырына чейин изилдене элек. Айрым адистер адамдардын шилекейинин курамы өзгөрүп, тамактын татымын даам рецепторлоруна жеткиче эле бузуп коет деп эсептейт. Башкалар рецептор өздөрү жабыркайт деген теорияны карманышат. Дал ошол себептен даам гана эмес, жыт сезүү дагы убактылуу жоголот.
"Адатта коронавируска кабылган адам башында жыт менен даам сезбей калат. Бирок эки апта өткөн соң бардыгы калыбына келет. Бирок бир нече ай өтсө дагы биз сөз кылып жаткан сезимдерди кайтара албай жүргөндөр бар", — деди адис.
Мындай бейтаптарга Будик атайын көнүгүүлөрдү жасоону сунуштайт.
Анын айтымында, күнүнө 20 секунддан бир нече жолу сарымсак, корица, гвоздиканы жыттап туруш керек. "Организм кайсы органга активдүү иштөө керек болуп жатса, дал ошого көбүрөөк энергияны бөлүп, аны толук кандуу иштетүүгө аракет кыла баштайт. Мындан тышкары, омега-3 ичип, мурун көңдөйүнө А витаминин тамчылатуу керек", — деген Будик.
Адистин айтымында, ушул эле аракеттер даам сезүүнү дагы калыбына алып келет. Анткени экөө бири-бири менен тыгыз байланышта иштейт.