БИШКЕК, 13-янв. — Sputnik. Быйылкы жылдын башынан баштап Бишкек шаары, Талас жана Жалал-Абад облустарында "Электрондук жеңилдетилген рецепттер" иштей баштады. Бул тууралуу Милдеттүү медициналык камсыздандыруу фондунан билдиришти.
"Электрондук жеңилдетилген рецепттер" системасында иштөөнү бейтапканалар менен дарыканалардын кызматкерлери беш ай бою үйрөнүштү.
"Эми рецепт жазылгандан тарта оорулуунун колуна дары тийгенге чейинки кызмат көрсөтүүлөр ыкчам жана сапаттуурак болуп калат. Айта кетчү нерсе, система бир гана интернет байланышты эмес, кызматкерден компьютерде мыкты иштөөсүн дагы талап кылат. Андыктан алгачкы учурларда кемчиликтерди түшүнүү менен кабыл алууну өтүнөбүз", — деди фонддун төрагасынын орун басары Клара Өскөмбаева.
Буга чейин электрондук жеңилдетилген рецепттер Ысык-Көл облусу жана Ош шаарында берилип келген. 2020-жылдын башынан бери дарыгерлер 515,4 миң электрондук рецепт жазган. Ал эми Милдеттүү медициналык камсыздандыруу фонду дарыканаларга кыргызстандыктарга берген жеңилдиктер үчүн 108,8 миллион сом төлөгөн.
Калктын камсыздандырылган категориясы — пенсионерлер, Социалдык фондго салык төлөп иштегендер, студенттер, 16 жашка чейинки балдар, кош бойлуу аялдар, жөлөк пул алган жарандар жана Милдеттүү медициналык камсыздандыруу полисин алган жарандар.
Жеңилдетилген шартта дарылангандар — бронхиалдык астма, эпилепсия, онкологиялык илдети, психологиялык оорусу бар бейтаптар жана диспансердик каттоодо турган жарандар.