БИШКЕК, 13-янв. — Sputnik. Бишкекти эки адамды өлтүрүүгө шектелген киши кармалды. Бул тууралуу шаардык милициядан билдиришти.
2-январь күнү кечинде Чыңгыз Айтматов проспектисинде жайгашкан көп кабаттуу үйдөгү батирден кыйнап өлтүрүлгөн 73 жаштагы кишинин сөөгү табылган. Анын төш жагына бир нече ирет бычак сайылган.
Адам өлтүрүү фактысы боюнча тажрыйбалуу тергөөчүлөр иштеп, шектүү катары 40 жаштагы мурда соттолгон кишини кармашкан.
Ал өз көрсөтмөсүндө өткөн жылдын 29-декабрында батирге кирип, үй ээсинин акчасын алып кетүүнү көздөгөнүн билдирген. Айтымында, карыган кишини бычактап, бирок акча таппай койгондуктан банктык картасын алып кеткен.
Шектүү бычакты кайда катканын көрсөтүп, үйдүн ачкычын ыргытып жибергенин билдирген.
Бишкек ШИИБ тергөө маалында шектүү дагы бир адамды өлтүргөнүн мойнуна алган. Сокулук районунун 67 жаштагы тургуну курмандыгы болгон. Улгайган аял 25-октябрдан бери дайынсыз жоголгондордун тизмесинде эле.
Милиция шектүү күнөөсүн мойнуна алып, аялды кантип өлтүргөнүн айтып берген видеосун жайылтты.
"Колго түшкөн киши 2020-жылдын октябрь айынын аягында аялдын акчасын алуу үчүн башка чапкан. Натыйжада ал мүрт кеткен. Киши аялдын сөөгүн Белогорка айылындагы тоого алып барып өрттөп салган", — дешти милициядан.
Шектүү Бишкек ШИИБдин убактылуу кармоочу жайына киргизилди. Милиция ал мындан башка дагы кылмыштарга тийиштиги бар болушу мүмкүн экенин болжоп жатат.