БИШКЕК, 11-янв. — Sputnik. Президенттик шайлоонун алдын ала жыйынтыгы менен алдыда келе жаткан Садыр Жапаров майда кылмыш кылып же күнөөсүз абакта жаткандар бошотулушу керектигин айтты.
Ал Бишкек шаарында маалымат жыйынын өткөрдү. Жапаровго журналисттер буга чейин ырайым алган 230 адам тууралуу маалыматтар ачыкталбаганы боюнча суроо беришти.
"Жашырчу эч нерсе жок, каалоочулар маалымат алсаңар болот. Негизи мен 230 киши аз деп эсептейм. Анткени мен отурган абакта бир миңдей адам жаза өтөп жатса, алардын жарымы күнөөсүз же майда кылмыштар үчүн отурган фактылар бар эле. Баарын тыкыр иликтеп көрүп, мунапыс же ырайым берүү жолу менен дагы чыгарышыбыз керек", — деди Жапаров.
Ошондой эле ал "майда кылмыш кылгандар элдин эсебинен тамактанып отура бербей, балдарын багып, ишке кирип салык төлөшү керектигин" кошумчалады.
Жапаров ырайым алгандардын арасында саясатчылар жок, жалаң карапайым адамдар экенин белгиледи.
Садыр Жапаров президенттин милдетин аткарып жаткан учурда абакта жаткан 230 адамга ырайым кылып, эркиндикке чыгарган. Кийин ал адамдардын тизмесин жарыялоо талабы коюлган.
Президенттик шайлоодон кийинки кырдаал тууралуу Sputnik Кыргызстандын тексттик баяндамасынан тааныша аласыздар.