БИШКЕК, 10-янв. — Sputnik. ИИМдин Тергөө кызматынын башчысы Султан Макилов "Ала-Тоо" аянтына чогулуп жаткандар тууралуу кабары жок экенин айтты.
Ал шайлоонун жүрүшүндөгү мыйзам бузуулар тууралуу маалымат берип жатканда журналисттер борбордук аянтта эмне болуп жатканын сурады.
"Аянтта эмне болуп жатканы туурасында маалымат жок бизде. Кылмыш же жорук болду деп бизге түшкөн жок. Тактап беребиз", — деди Макилов.
Белгилей кетсек, учурда Бишкектин "Ала-Тоо" аянтында белгисиз бирөөлөр концерт өткөрөбүз деп дайынданып жатышат.
Президенттик шайлоо жана референдум
Бүгүн өлкө боюнча 2 474, ал эми чет өлкөдө 48 шайлоо участкасы ачылган. Жалпы жонунан 3 563 574 кыргызстандык добуш берүү укугуна ээ.
Мамлекет башчылыкка 17 талапкер ат салышууда, кимиси шайлоочулардын 50 пайыздан жогорку добушун алса жеңүүчү деп аныкталат.
Ал эми башкаруу формасын тандаган референдум өттү деп таануу үчүн шайлоочулардын 30 пайызы (1 миллион 69 миң жаран) катышышы керек.
Кыргызстандыктарга экиден бюллетень берилет: биринчисинде президенттикке талапкерлердин ысымы жазылган (ак түстө), экинчисинде башкаруу формасын аныктоо боюнча (көк түстө).
Шайлоо участкалары саат 20:00дө жабылды.
Кыргызстандын аймагында шайлоо кандай өтүп жатканын Sputnik даярдаган тексттик трансляциядан окуп-билүүгө болот.