БИШКЕК, 17-дек. — Sputnik. Талас облусундагы "Чоң Капка" көзөмөл-өткөрүү бекетинен Кыргызстандын аймагына мыйзамсыз жол менен алынып келе жаткан дары-дармектер табылды. Бул тууралуу УКМКдан кабарлашты.
Таластагы кыргыз-казак чек арасынан мыйзамсыз дары-дармек ташыгандар кармалды
© Фото / пресс-служба ГКНБ
Маалыматка караганда, жүк 16-декабрда Чек ара кызматы менен биргеликте жүргүзгөн иш-чаранын алкагында табылган.
"Дарынын 176 түрү салынган 100 кутучанын тиешелүү уруксат кагаздары болгон эмес. Алдын ала эсептөөлөр боюнча, жүктүн баасы төрт миллион сомдон ашык суммага барабар", — дешти УКМКдан.
Учурда товардын чоо-жайын тактоо максатында материалдар өкмөткө караштуу Экономикалык кылмыштарга каршы күрөшүү боюнча мамлекеттик кызматка жиберилди.