БИШКЕК, 15-дек. — Sputnik. Чүйдө автоунаада 4 килограммдан ашык баңгизат ташып бара жаткандар кармалды. Бул тууралуу ИИМдин Баңгизатты мыйзамсыз жүгүртүүгө каршы күрөшүү кызматы (БМЖККК) кабарлады.
Аталган кызматтын Чүй облусу боюнча башкармалыгы, Москва РИИБдин Криминалдык милиция кызматынын жана Жол кыймылы коопсуздугун камсыздоо бөлүмүнүн кызматкерлери баңгизаттарды мыйзамсыз ташуу менен алектенген фактыны аныкташып, шектүүлөрдү кармашкан.
Машинаны кароо жүргүзгөн учурда жүргүнчүгө таандык болгон кол сумкадан 21,58 грамм өзгөчө кендир жыты бар каражат табылган. Ал эми айдоочунун азык-түлүк салынган баштыгынын ичинен өзгөчө кендир жыты бар 9 даана таңгакталган каражат алынган. Соттук-химиялык изилдөө алар жалпы салмагы 4 килограмм 236 граммды түзгөн гашиш баңгизаты экенин аныктаган.
Кармалгандар убактылуу кармоо жайына киргизилип, учурда сотко чейинки өндүрүш иши уланууда.