БИШКЕК, 1-дек. — Sputnik. Бишкек шаарына суу каналдарынын үстүнөн өткөн метро салсамбы деп ойлогом, бирок ага жетишпей калам. Бул тууралуу мэрдин милдетин аткаруучу Балбак Түлөбаев Sputnik Кыргызстан агенттигинин мультимедиалык борборунда өткөн онлайн-брифингде билдирди.
Журналист ага "бийлик буга чейин автобустар үчүн атайын тилке болот деп айткан эле, ошол долбоор боюнча айтып берсеңиз?" деген суроо узаткан.
"Көп долбоорлор бар болчу. Бирок аларды ишке ашырууга мөөнөтүм бүтүп, жетишпей калам. Негизи Бишкекти аралап өткөн каналдардын үстүнө метро салсамбы деп ойлогом. Анткени калаада автобустарга өзүнчө тилке ача албайбыз, ал тургай жаңы автобус да ала албайбыз. Бишкекти кантип чоебуз? Шаардагы транспорт маселесин башка жол менен чечүү керек. Өзүңөр деле картадан карасаңар, Бишкекти эки суу аралап өтөт. Ошол суулардын үстүнөн өткүдөй метробус салып койсок шаардагы көйгөйдү чечмекпиз", — деди Түлөбаев.
"Бизде жолдор даяр, суунун үстүнөн өтө турган метробустун линиясын куруу керек дагы, иштетүү зарыл. Мындай метрону Япония, Кытай салды, кыргыз эмнеге сала албайт?! Насыя алып туруп куруш керек. Ал кайра өзүн-өзү актайт", — деди калаа башчынын милдетин аткаруучу.
Түлөбаев кийинки жылдын жаз айында анын иштөө мөөнөтү аяктай турганын кошумчалады.