БИШКЕК, 7-ноя. — Sputnik. Бийлик коронавирустун жайылышын алдын алууда мындан ары хлор сатып алууга каражат коротпойт.
Бул тууралуу вице-премьер, Республикалык штабдын башчысы Эльвира Сурабалдиева Twitter баракчасы аркылуу кабарлады.
"Мен пайдасы жок хлорду колдонууну жокко чыгардым. Ага мамлекеттен канчалаган миллион кетти. Бүгүндөн тарта вирус менен күрөшүүдө ал каражат сатып алынбайт", — деп жазган Сурабалдиева.
Эске салсак, жайында "Бишкекте пневмония илдети дезинфекциялоо чараларынан улам күч алды" деген кабарлар социалдык тармактарда жана мессенджерлерде тарап кеткен.
Саламаттык сактоо министринин орун басары Нурболот Үсөнбаев хлордон ууланып пневмонияга кабылган учурлар жок экенин айткан.
Sputnik Кыргызстан бул маселе боюнча адистердин пикирин уккан.